• product
  • بیوٹی ٹپس
  • پکوان
  • خواتین کے مخصوص مسائل
  • ستارے کیا کہتے ہیں؟
  • صحت و تندرستی
  • فیشن
  • گھریلو مسا ئل اور ان کا حل
  • متفرق
  • مردوں کے مسائل
  • ہنستے مسکراتے رہیے
  • بیوٹی ٹپس

    وہ 7 بڑی غلطیاں جو چہرے سے تروتازگی کو چھین لیتی ہیں

    a

    اگر آپ کی جلد بے جان اور روکھی نظر آتی ہے تو ہوسکتا ہے کہ آپ کچھ ایسی غلطیاں کر رہے ہوں جن کا اثر آپ کی جلد پر پڑ رہا ہو۔

    بظاہر یہ غلطیاں بہت معمولی لگتی ہیں لیکن اگر طویل عرصے تک کی جاتی رہیں تو یہ جلد پر انتہائی برے اثرات مرتب کرسکتی ہیں۔ غور کیجئے کہ کہیں آپ بھی یہ غلطیاں تو نہیں کررہے۔

    پانی کی کمی:

    ہوسکتا ہے کہ آپ کم مقدار میں پانی پی رہے ہوں۔ اگر ایسا ہے تو جان لیں کہ آپ کی جلد پر وقت سے پہلے جھریاں پڑنے کی ایک وجہ آپ کے جسم میں پانی کی قلت (ڈی ہائیڈریشن) بھی ہوسکتی ہے۔ اس لیے بہتر ہے کہ روزانہ 2 سے 3 لیٹر (8 سے 12 گلاس) پانی پئیں۔ اس سے آپ کو صحت کے بہت سے مسائل سے چھٹکارا پانے میں مدد ملے گی اور آپ کی جلد بھی زیادہ ہشاش بشاش نظر آئے گی۔

    مٹھاس اور چکنائی سے بھرپور غذائیں

    آکسیڈیشن وہ عمل ہے جو ہمارے جسم میں آزاد ریڈیکلز پیدا کرتا ہے اور یہ آزاد ریڈیکلز جلد سمیت ہمارے کئی اعضاء کو نقصان پہنچاتے ہیں۔ زیادہ مٹھاس والی اور چکنائی سے بھرپور غذائیں آزاد ریڈیکلز کی پیداوار بڑھاتی ہیں اس لیے ان سے پرہیز کریں۔ اچھی صحت اور جلد کے لیے سبز چائے پئیں، شکر کا استعمال کم رکھیں اور تازہ پھل و سبزیاں کھانے کی عادت ڈالیں۔

    کیفین کا استعمال

    چائے، کافی اور کولا مشروبات میں کیفین کی بڑی مقدار موجود ہوتی ہے اور ان کا زیادہ استعمال آپ کے جسم میں پانی کی قلت پیدا کرنے کے ساتھ ساتھ آکسیڈیشن بڑھانے کا باعث بھی بنتا ہے۔ یہی وجہ ہے کہ انہیں زیادہ استعمال کرنے کے باوجود ان کی طلب کبھی ختم نہیں ہوتی۔ بہتر ہے کہ ان سے چھٹکارا پائیں اور اگر یہ ممکن نہ ہوسکے تو انہیں کم سے کم مقدار میں استعمال کریں۔

    شراب نوشی

    اُم الخبائث حرام تو ہے ہی لیکن ساتھ ہی ساتھ یہ کیفین سے بھی زیادہ نقصان دہ ہے۔ اس میں شکر کی مقدار بہت زیادہ ہوتی جو جسم میں آکسیڈیشن بڑھاتی ہے اور ڈی ہائیڈریشن کا باعث بھی بنتی ہے۔ یہ جگر کو شدید نقصان پہنچانے کے علاوہ چہرے کو بھی تازگی سے محروم کردیتی ہے۔

    تمباکو نوشی

    تمباکو میں شامل نکوٹین اور دوسرے مرکبات آپ کے جسم میں آزاد ریڈیکلز اور عمر رسیدگی کی رفتار بڑھانے کا موجب بنتے ہیں۔ وٹامن سی، جو ہمارے جسم کا قدرتی اینٹی آکسیڈینٹ بھی ہے، سگریٹ نوشی کا پہلا شکار بنتا ہے۔ اپنی جان کو ہزار امراض سے بچائیں اور سگریٹ کی جگہ سبز پتوں والی سبزیوں کے علاوہ رس دار پھلوں کو اپنی روزمرہ غذا کا حصہ بنائیں۔

    سبزیوں سے پرہیز

    وہ لوگ جو سبزیاں کھاتے وقت ناک منہ بناتے ہیں ان کے لیے سبزیوں کا رس پینا اس سے بھی بڑا مسئلہ ہوتا ہے۔ لیکن یقین رکھیں کہ سبزیوں کا رس آپ کی صحت، بطورِ خاص آپ کی جلد کو بہت فائدہ پہنچائے گا۔ سبزیوں کے رس سے بہتر فائدہ اٹھانے کا ایک طریقہ یہ ہے کہ پہلے 3 کچی سبزیوں کا رس نکال کر جگ میں اکٹھا کرلیإ لیکن بچ رہنے والے پھوک (پلپ) میں سے آدھا اس جگ میں (رس کے ساتھ) ملا دیں اب اس میں تھوڑا سا پانی اور معمولی مقدار میں کالی مرچ اور نمک بھی ملالیں تاکہ اس کا ذائقہ بہتر ہوجائے۔ اس طرح سے تیار ہونے والے سبزیوں کے رس کا ایک گلاس روزانہ پئیں اور جلد پر اس کے حیرت انگیز اثرات صرف ایک مہینے بعد خود ملاحظہ کریں۔

    نیند کی کمی

    نیند ہمارے معمولات کا وہ حصہ ہے جس کے دوران ہماری اپنی مرمت خودکار طور پر کرتی ہے۔ اگر آپ کو پوری نیند نہ مل رہی ہو تو آپ کے چہرے پر عمر رسیدگی کے اثرات زیادہ نمایاں ہوں گے۔ پوری نیند سے مراد یہ ہے کہ جب آپ سو کر اٹھیں تو خود کو تازہ دم محسوس کریں نہ کہ تھکا ماندہ ہوا۔ پوری نیند کا دورانیہ مختلف افراد کے لیے مختلف ہوسکتا ہے۔ کچھ لوگ صرف 4 گھنٹے سونے کے بعد بھی تازہ دم ہوجاتے ہیں جب کہ کچھ لوگ جب تک 8 گھنٹے نہ سوئیں، ان پر سستی سوار رہتی ہے۔

    ان تمام مشوروں سے ظاہر ہوتا ہے کہ اگر آپ مجموعی طور پر صحت مند رہنا چاہتے ہیں اور چاہتے ہیں کہ آپ کی جلد بھی جوان، پرکشش اور تر و تازہ نظر آئے تو اس کے لیے آپ کو اپنے زندگی گزارنے کے انداز میں تبدیلی کرنا ہوگی۔ یعنی آپ کی صحت آپ کے اپنے ہاتھوں میں ہے۔

    آرڈر

    b

    c